~ Dari: Forum kajian Jum'atan, 24 September 2010 KOREKSI PARA SEPUH Sesuai nyang udeh kite siar lewat undangan, Forum kajian Jum’at , 24 September kemaren bakal kedatengan sesepuh kite, Ridwan Saidi. Alhamdulillah Ridwan Saidi atawe nyang biase kite panggil Dato dateng bersama Budayawan Betawi lainnye, yaitu babeh Rahmat. Budayawan mudanye bang Yahya Andi Saputra nyang bertindak sebage tuan rumah di LKB, lalu hadir juga Rochim dari pihak kedinesan. Dari pertemuan nyang dibikin sesantai mungkin layaknye orang ngobrol, udeh pasti banyak masukan nyang bise kite petik. Tapi dari sekian banyak nyang diomongin, penekanan para sepuh kali ini sedikit berbelok ke soal upacare adat Palang Pintu. Mereka bangge karena Palang Pintu sekarang mulain nyohor lagi, pake ada vestifalnye segale. Nah, lantaran ntu mereka gak mau kecolongan ampe ni adat nantinye jadi begeser dari pilosofinye. Emang, kate dato Ridwan sampe ni ari semue masih berjalan bagus. Gak ade nyang perlu dirobah dari segi penataan ampe urut-urutannye. Cuman, katanye, sebisanye hal-hal nyang emang mustinye ade jangan ampe ade nyang kelewat barang dikit. Salah satunye ‘nyepun’ atau dalam adat Sunda/Jawa biasa disebut nyawer. “Ini ade dalam adat kite. Cuman namanye nyepun. Nah ntu bisa diselipin sehabis urusan akad nikeh,” begitu teges Dato. Hal lainnye adalah soal payung. Payung itu kudu payung item. Bukan payung kertas, karena fungsinye beda. Payung enih punya makna perlindungan. Mangkanye payung nyang dipake si penganten laki kudu diserahin ke penganten perempuannye, sebage pelambang si lelaki bakal jadi pelindung idupnye. Hal itu diurai dato Ridwan dan babeh Rahmat, karena menurut mereka lima unsur nyang ade dalem upacara adat Palang Pintu semua punya maknanye sendiri. Kembang adalah unsur nyang dipuja (si mahasoja), metal atawe uang logam sebagai lambang penangkal enerji negatif, payung lambang perlindungan, beras lambang kemakmuran dan air lambang pengorbanan. Kenape aer jadi lambang pengorbanan? Menurut babeh Rahmat karena dalam sejarah asal mulanye adat ntu dulu, aer nyang digunain bukan sembarang aer. Aer nyang sekarang diganti aer mawar dulunye aer dari sungai Nil. “Aer itu dibawa pake kelapa jenggi. Itu satu-satunye jenis kelapa besar nyang cuman ade di Afrika,” katanye. Supaye pelaku dan penyaksi upacara adat bisa faham semua maksud tujuannye, maka ada baeknye pengertian tentang makna-makna ntu dipaparin lebih jelas lewat narasi. Koreksi selanjutnya, menurut babeh Rahmat dulunye adegan perkelahian itu gak sampe ngalahin satu pihak. Jadi begitu mereka berkelahi, para tetuanye langsung turun dalam lakon mendamaikan. Lantaran, adat Palang Pintu ini dilaksanain buat nganterin niat baik nyatuin dua pribadi, dua keluarge, dua suku (kalo beda) dan seterusnye dalem ikatan pernikahan. Jadi kenape kudu ade nyang dikalahin dulu? Begitu deh pertanyaannye. Kemudian nyang gak kalah penting, dato Ridwan juga nyorotin soal suare. Sering katanye upacara dibawain dengan suare nyang keras gak karuan. Suare boleh kenceng, boleh pake pengeras suare, tapi intonasi atawe nada bicare tetep kudu dijage, dibikin selembut mungkin jangan sampe ngeganggu lingkungan insuler kite. Tujuannye supaye apa nyang kite ungkapin bisa diterime telinga dengan baek, maksud positif gak jadi kedengaran degatif. Nah, terutama buat para pelaksana adat Palang Pintu, mudah-mudahan bisa jadi masukan yang bermanfaat. ©http://www.facebook.com/pages/Lembaga-Kebudayaan-Betawi/128947540457941?ref=sgm
Tidak ada komentar:
Posting Komentar